Liber Psalmorum, 146

1. Alleluja. Laudate Dominum, quoniam bonus est psalmus ; Deo nostro sit jucunda, decoraque laudatio.

2. Ædificans Jerusalem Dominus, dispersiones Israëlis congregabit:

3. qui sanat contritos corde, et alligat contritiones eorum ;

4. qui numerat multitudinem stellarum, et omnibus eis nomina vocat.

5. Magnus Dominus noster, et magna virtus ejus, et sapientiæ ejus non est numerus.

6. Suscipiens mansuetos Dominus ; humilians autem peccatores usque ad terram.

7. Præcinite Domino in confessione ; psallite Deo nostro in cithara.

8. Qui operit cælum nubibus, et parat terræ pluviam ; qui producit in montibus fœnum, et herbam servituti hominum ;

9. qui dat jumentis escam ipsorum, et pullis corvorum invocantibus eum.

10. Non in fortitudine equi voluntatem habebit, nec in tibiis viri beneplacitum erit ei.

11. Beneplacitum est Domino super timentes eum, et in eis qui sperant super misericordia ejus.